Aurreko postean azaldu dugun bezala, gaurkoan gonbidatu bat daukagu gure blog honetan: Ira Gvatua Elle Rusia eta Collezioni argitalpenetako erredakzioko kolaboratzaileak Maison Martin Margielak Noventa Gradosen eskaintzen dituen jantzi eta piezen ezaugarri eta xehetasun nabarmenenak azaldu dizkigu. Hona hemen bere hitzak:

Maison Martin Margiela etxeak Noventa Gradosen eskaintzen dizkigun piezetatik, nire iritziz, honako hauek dira apartenak:

Oinetakoak: 1979 Replica “Ceremonial Shoes” saloi-zapatak. Nizan (Frantzian) eginiko antezko zapatak, orkatilean larru urreztatuzko zerrendarekin eta 9 zm-ko takoidunak.

Osagarriak: artisau eran eginiko larruzko zorro eta poltsak. Metalezko eta larruzko zerrendekin osatuak. Forma errektangular eta organikodunak, egunez zein gauez erabiltzeko balio dute.

Tailoring: dekonstrukzio-joskintzako bi piezak osatua. Zalantzarik gabe, Maison Martin Margiela-ren erreferentzia nagusietako bat (dekonstrukzioa) oinarri duten pieza hauek bildumako izarrak dira!

Biker txalekoa: biker estiloko larruzko txalekoa. Metalezko tatxet txikiz zipriztindua, gazazko estalki gardenak leundu egiten du. Pasarelan zein mundu osoko dendarik esanguratsuenetan arrakasta itzela izan duen jantzia da.

Series 4: alkandora eta prakak, eguneroko jantziak, oversize erakoak eta estilo asko daukatenak. Trench luze bat, lana eta zetazko voile erdi-garden batean egina, arin-arina, kalitate bikainekoa. Klasiko birrasmatua.

Bitxiak: etxearen izena grabatua daramaten bitxi lakatuak. Metalezko eraztun, zintzilikario, tiara eta eskumuturrekoak. Luxuak eta identitateak bilduma osatzen dute, argia, disdira eta kolorea eskainiz. Erabilitako materialak: urrea, zilarra eta urre arrosa (azken hau egungo bitxigintza internazionaleko bildumarik onenen kolore-izarra da).

Lihazki seriea: SS12 denboraldiko Maison Martin Margiela-ren hype-etako bat. Kotoizko elastikoak, aurreko aldean lihazkiak dituztenak eta eskuz, spray-arekin, pintatuak daudenak, banan-banan. Kolorea eta dibertsioa 2012ko udarako.

Soinekoak: zetazko soineko luzeak, metalezko tatxetetik, degradé eran jarriak. Cocktail soineko edo gonak dira, sofistikatuak eta, era berean, punk jarrera erakusten dutenak, tatxetei esker. Maison Martin Margiela-ren diseinuak gaur egun egiten duen talde gaztearen ikuspegi berriaren adibide garbia. Jarrera moderno eta axolagabea.

Tolesak, geruzak: tolesekin eta geruzekin osatutako piezak. Zeta eta kotoia nahasten dira, berde pastel koloreko tonuetan. Kasu honetan, etxe honek garai batean egin zituen bolumenei errepasoa egin diete jantzi hauekin.

Jaka soinekoak: denboraldi berriko atalik esperimental eta ausartenetakoena da. Marcialek apustu ausarta egin du pieza hauek Noventa Gradosera ekartzean. Itxiera, kremailera eta posizio ugaridun piezak dira. Hainbat materialetan eginak (zeta, popelin eta sintetikoak). Soineko hauek, osagarrien serieko gerrikoekin batera jantziak, forma berezidun estiloak sortzen dituzte. Jantzi hauen aldeko apustuak Espainia osoko eta, noski, orohar, Europako denda ausart eta berritzaileenetako bat bilakatzen dute Noventa Grados.

Transgresioa, zorroztasuna, abangoardia, kalitatea, aukeraketa zaindua, esperimentazioa eta, zergatik ez, ausardia. Guzti hauek dira Maison Martin Margielak SS12 denboraldirako Noventa Gradosen aurkeztu duen bildumaren ezaugarriak.

Testua: Ira Gvatua

Portada argazkia: Oscar B. Venegas

Berezitasun eta izaera handiko etxea da Maison Martin Margiela, izan ere, bere fundatzailea azken hogei urteotako modaren iraultzaile nagusienetako bat izan da. Anberesko Arte Ederretako Errege Akademian ikasi zuen, Belgikako beste diseinatzaile esanguratsu batzuekin batera, hala nola, Dries Van Noten eta Ann Demeulemeester, Anberesko Seiak bezala ezagutu zen sortzaile-taldeko kideak. Jende askok Margiela taldeko zazpigarren kidetzat dauka, guztiak garaikideak izateaz gain, modara era beretsuan ekarri baitzuten iraultza, guztiek ere. Dekonstrukzioaren eta transformazioaren bidez, Belgikako enfant terrible zorrotz hauek, Japoniako diseinatzaileen eragin handiarekin (Rei Kawakubo, esaterako), Mendebaldean modari buruz zeuden ideia onartuak hankaz gora jarri zituzten.

“Izar” iheskorra

Margielaren kasuan, artearen eta modaren arteko muga ahula behin eta berriz higatu duen ekarpen erradikala sortu zuen, eta ez bakarrik abangoardiako jantziak -hauetako asko kontzeptualak- aurkeztuz, baizik eta modaren negozioa irudikatzen duten hainbat ikur desagertaraziz, “diseinatzaile-izarra” barne. Izan ere, Martin Margiela ez zen inoiz agertzen bere desfileen ostean publikoa agurtzen eta prentsan ere ez da inoiz bere argazkirik argitaratu. Esaterako, Google-en bere irudiak bilatu nahi dituenak, 1997.urtean atera zitzaion argazki bat baino ez du aurkituko. Elkarrizketak fax-ez erantzuten dituzte bulegotik eta, orohar, modaren star system tradizionalarekin hausten duten beste hainbat ezaugarrirengatik ere nabarmendu da belgiar sortzailea. Margielaren jarrera zorrotz honek talde-lana goraipatzen du, izan ere, etxeko langileek antzinako jostun-etxeetan bezala, bata zuria janzten dute (oihal zuriz estaltzen dira, baita ere, hainbat altzari eta bestelako elementuak Margiela-renean) eta markaren izenak ere, Maison hitza diseinatzailearen deituraren aurretik jarrita, han sortzen denaren izaera kolektiboa azpimarratzen du, esan bezala, “diseinatzaile-izarra” kontzeptuaren antipodetan. Esanguratsua da, baita ere, jantzien diseinu-lerroak eta hauen etiketak: Maison Martin Margielako diseinu-lerro bakoitza 0 eta 23 bitarteko zenbaki batekin identifikatzen da. Jantzi bakoitzaren etiketan, zenbaki zerrenda osoa agertzen da, pieza horri dagokion zenbakia borobil batean sartua ikusten delarik. Etiketa zuria da eta kolore bereko lau puntadarekin josten da jantzian, logorik edo bestelako zeinu arranditsurik gabe, goiko argazkian ikus daiteken legez.

Noventa Gradoseko eskaintza

Maison Martin Margielaren bost lerro ekarri ditugu Noventa Gradosera: Serie 1 eta Serie 4 emakumezko arropa lerroak, osagarri eta bitxien Serie 11 eta Serie 22 eta Replica deituriko oinetako lerroak. Maison Martin Margielari buruzko hurrengo postean, Ira Gvatua Elle Rusia eta Collezioni argitalpenetako erredakzioko kolaboratzailearen hitzak batu ditugu. Gurean aurki ditzakezun jantzi eta piezen errepasoa egingo du berak, bere iritziz nabarmenak diren ezaugarriak azpimarratuz.

Izan ere, aste osoko kezkak eta buruhausteak alde batera utzi nahi badituzu, Côte Bar-eko Mikel Insaustik eta bere lantaldeak beren txokora gerturatzera gonbidatu nahi zaituzte, lankideekin edo lagunekin batera joan zaitezen, maitasun osoz prestatzen dituzten koktel zoragarrietako bat hartzera, estresa gainetik kentzera, giro ederrean, eta, aipatu dugun bezala, prezio oso arrazoizkoan, eta hori, gaur egungo garai latzetan, benetan eskertzen den apustua da.

Noventa Gradosen egingo dugu After Work ekimenaren aurkezpena, esan bezala. Datorren astean izango da aurkezpen-festa, hilaren 24an, osteguna, iluntzeko zortzietatik aurrera. Côte Bar-eko lagunak gurera etorriko dira, ostegunero eskainiko digutenaren aurrerapen bat dastatzeko aukera izan dezagun: koktelak, mokautxoak eta DJ Racho Côte Bar-eko etxeko dj-aren musika ez dira faltako! Gonbidapen benetan tentagarria, ezta? Sartu Facebook-eko gure orrialdean eta eman ezazue izena ekimenaren hitzorduan. Maiatzaren 24an, Noventa Gradosen, Lokalirriren laguntzarekin eta Côte Bar-en eskutik, After Work Party!

Vidal Sassoon 14 urtekin hasi zen ikastun Londresko ile-apaindegi batean, haren amak ziur omen baitzekien semea ile-apaintzaile izango zela, eta han sartu zuen lanean. 50.hamarkadaren amaieran eta 60. hamarkadaren hasieran izaera arkitektonikoko ile-mozketa sortu zuen, laka, kardatu eta erruloen menpean zeuden orrazkera zurrunen mundu zaharkitua eraberrituz. Zalantzarik gabe, Vidal Sassoon, Mary Quant eta bere minigona bezalaxe (argazkian Mary Quant-i ilea mozten azaltzen da, hain zuzen ere), 60.hamarkadako modaren iraultza bultzatu zuten giltzarrietako bat izan zen. Bere ile motz eta geometrikoekin, sexy mota berri bat asmatu zuen, eta ordutik, mundu osoko milioika eta milioika emakumek bere egin dute.

Esan bezala, guretzat erreferentziazko maisua izan da Vidal Sassoon. Noventa Grados-eko ile-apaindegiko lantaldeak hamaika formazio ikastaro egin ditu etxearen Londresko egoitzetan. Izan ere, guk ere irudi geometrikoak oinarri dituen teknikarekin mozten dugu ilea, Vidal Sassoon-en estiloari jarraituz: aurpegiaren hezurdurarekin eta formarekin oreka lortzen duten mozteekin, ilearen joera naturalak errespetatuz eta formarik harmoniatsuenetan landuz, zizelkatuz; etxean ere, orrazkerak erabilgarria era erosoa izaten jarrai dezan. Gauza arrunta iruditzen zaigun arren, ile-apainketa ulertzeko modu hau Vidal Sassoon-en jenioari zor diogu. Agur eta ohore ile-apainketa garaikidearen aitzindari eta maisu handiari.

Martxoaren 9an Noventa Gradosen egin zen bezala, Biarritzen ere Lokalirrik berriki eman duen jauzi esanguratsua aurkeztuko du: aldizkariaren goitik beherako berritzea eta teknologian murgiltzeko egin duten apostu sendoa, aldizkariaren app-a sortuz. Guzti honek behar den bezalako ospakizun eta aurkezpena merezi duenez, egitarau bete eta oso erakargarria prestatu dute etzirako. Noventa Gradosek ere eskainiko du oparitxoren bat edo beste festara hurbiltzen zaretenoi. Lokalirriren facebook-ean ekimena daukazue eta bertan izena eman dezakezue. Festaren egitaraua, berriz, hemen daukazue:

. Lokalirri aldizkariaren 7.alearen aurkezpena.
. Lokalirriren Iphone eta Ipad (ios.4.2)-erako aplikazioaren aurkezpena.
. Zuzeneko kontzertu sorpresa!
. Artnoa etxeko Antoine Vignac-en ardo dastaketa.
. Les Puits d’Amour de Xabi-ren Puits d’Amour gozoen dastaketa.
. Oparitxoak: Kiki Ritz, Noventa Grados…

Ekimena dela eta, Bi Arty izeneko fardel serie mugatua (15) izango da salgai. Fardel bakoitzean Lokalirriren ale bat + Lokalirri & Jean Jacques bildumazale-elastiko bat + Anna Petrissans-en jatorrizko ilustrazio bat + Franck Cazenave-ren jatorrizko diseinu bat + Housse Ipad Combhard bat.

Bi Appy after party: festak Palacito Biarritz hoteleko tabernan izango du segida, Izarra etxearen dastaketa batekin eta dj set eta guzti.

Kaixo Pablo! Kontaiguzu, zertan aurkitzen duzu inspirazioa collageak sortzeko orduan?
Denetarik dago. Erreferentziak ugari dira, noski, eta askotarikoak. Ez dakit bada, ideia etor daiteke iragarki batetik, nobela baten pasarteren batetik, pelikula bateko eszena batetik, errealitatetik bertatik… Eta berez ere sortzen dira, lantzen ditudan irudiekin jolasean ari naizela.

Nolakoa da lan bakoitzaren sormen-prozesua eta zenbat iraun dezake? Bulkadaka lan egiten al duzu?
Sormen-prozesua desberdina izan ohi da aldi bakoitzean. Batzutan ideia buruan daukazu eta soilik lanean jarri behar zara. Beste askotan gertatu ohi da ideia, irudikatzen dudanean, eraldatuz joaten dela eta gauza guztiz diferentea bilakatzen; horrela, ikuspuntu kreatibo batetik, jokoa interesgarriagoa bihurtzen da. Beste batzutan, abiapuntua irudi batek edo argazki batek, edo lehenago aipatu dudan bezala, “itzartu” egiten zaituen erreferentzia batek ematen dizu, eta horrek beste irudi edo konposizio batera eramaten zaitu. Eta, askotan, norberak nahi baino gehiagotan, aurreko guzti horrek ez du funtzionatzen eta hobe izaten da lana utzi eta beste zerbait egin.

Eta bai, bulkadaka lan egin ohi dut. Baina ez horrenbeste lan jakin bat burutzerakoan, baizik eta orohar, dinamika baten murgiltzen zara, kasu honeta collage-ak egiten, eta denbora nahiko laburrean produkzio oparoa sor dezaket. Hala ere, kontrakoa ere gertatzen da, hau da, intentsitatea galtzen hastea eta luzaroan ezertxo ere egin gabe egotea.

Zein da zure lan ohikeria? Baduzu mania, fetitxe edo erritualik lanean hasteko orduan?
Bada, aurreko galderan esan dudanez, boladaka egiten dut lan. Argazkiak batu eta ideiak apuntatu ohi ditut, eta gero, poliki-poliki, bueltak ematen hasten natzaio material guzti horri, harekin zer egin dezakedan erabakitzeko. Mania, fetitxe edo erritualak ez dira asko, tira, izan ere ez dira, egia esan. Etxeko egongelan egin ohi dut lan, ordenagailua eta telebista pizturik, besterik gabe, guztia oso arrunta.

Aipa ditzakezu erreferente nagusitzat dituzun artistak edo espresio kulturalak?
Galdera hau erantzuteko izen zerrenda luze bat idatz genezake, izan ere, erreferentziak ugariak baitira eta gauza asko interesatzen zaizkit, eta guztiak eza daude, gainera, collage-aren munduarekin lotuak. Espresio kulturalei dagokienez, literatua erreferente oso zuzena da, eta baita zinema, argazkilaritza eta musika ere, besteak beste.

Collage-aren munduari dagokionez, asko gustatzen zaidan jendea bada, baina garaikideak aipatuko ditut. Esaterako, Joseba Elorza (Miraruido), Gloria Vilches, Sr. García, Julien Pacaud (collage-aren klasiko bat jada), etab. Pinturan, eta adibide bat jartzearren (bihar beste batzuk esan baititzaket), Magritte, David Hockney, Chirico, Eduardo Arroyo, Yturralde, etab. etortzen zaizkit gogora. Instalazioen mundua ere asko interesatzen zait… eta oso komiki-zalea izan ez arren, oso arte interesgarria dela deritzot, bertatik asko ikas daitekeela. Beste esparru batean El Roto aipatuko nuke, bere lanaren jarraitzailea bainaiz, bai bere binetena eta baita haren lan grafikoarena ere; edo Miguel Brieva, nire ustez marrazkilari hutsa izatetik baino haratago doana eta lan ikaragarriak egiten ari dena… baina, ikusten duzunez, izen batek beste batera garamatza eta hau amaigabea izango litzateke.

Eskerrik asko, Pablo!

Eta zuek badakizue: etzazue galdu Pablo Casares-en erakusketa Noventa Gradosen. Ostiral honetan izango da inaugurazioa, 20:00etan, Appy Party festaren baitan eta apirilaren 28ra arte egongo da gure espazioan.

Lokalirriko lagunek eraberritze totala egin dute beren aldizkarian, eta nobedade guztiak gure espazioan aurkeztuko dituzte, esklusiban: batetik, paperezko edizio berria, formatu eta itxura oso erakargarri batekin eta, bestetik, beraien App berri-berria, Lokalirri sakelekoan eta tabletan eramateko.

Festan artea ere ez da faltako. Bai Lokalirrirentzat eta baita Noventa Gradosentzat ere, arteak berebiziko garrantzia baitu. Biarritzekoek Pablo Casares artista donostiarraren berri emango digute beren ale berrian eta, egokiera aprobetxatuz, Casares-en collage-lanen erakusketa aurkeztuko dugu. Appy Party iluntzeko 20:00etan hasiko da Noventa Gradosen, eta gaueko 22:00ak arte iraungo du, Scherlock & Xidra Dj-en musikarekin, Izarra Hendaiako etxe historikoko lagunek prestaturiko koktel vintage zoragarriekin eta opari gehiagorekin. Baina festa ez da hor amaituko! Ondoren, Alde Zaharrean bertan dagoen Côte Bar tabernara joango baikara, pintxo batzuk jan eta dantzan jarraitzeko, Dj Rachoren eskutik. Eta 01:00ean, MoÏ-Moï Records eta Traum-eko SanPanTzar Dj Set eta Matthys Dj Set-en erritmoek Komplot-en elkartuko gaituzte, gorputzak nahikoa esan arte! Ez ahaztu festako flyer-a hartzea, bertan aurkituko baituzu Komplotera dohainik sartzeko txartela!

Gure Online Denda eta Erosketa Pribatuko atala ere artikulu berriekin betetzen hasi gara egun hauetan. Hori dela eta, atal hauek bisitatzerakoan, hutsuneak-edo somatzen badituzu, denboraldi aldaketan dihardugulako da. Pazientzia piskat eskatu nahi genizuke, badakigu eta pieza berri guztiak ezagutzeko irrikitan zaudela. Bada, egunero izango da zerbait berria gurean, beraz… stay tuned! Eta barkatu eragozpenak.